„Þessir biðlistar eru erfiðir og skaðlegir, sérstaklega fyrir unga krakka“

Atli Magnússon framkvæmdarstjóri Arnarskóla talar um starf skólans og hvernig hann mætir þörfum barna með þroskafrávik í nýjasta þætti Spjallið með Góðvild. 
Atli Magnússon framkvæmdarstjóri Arnarskóla talar um starf skólans og hvernig hann mætir þörfum barna með þroskafrávik í nýjasta þætti Spjallið með Góðvild. SKJÁSKOT

„Með því að byggja upp skólastarfið eins og okkur er kleift að gera þá fá þessir krakkar sama tíma og aðrir krakkar, í öðrum skólum til þess að læra,“ segir Atli Magnússon framkvæmdarstjóri Arnarskóla í viðtali við Spjallið Góðvild.

„Þetta er lítill skóli sem við hugsuðum fyrir börn með einhverfu og þroskafrávik sem þurfa mikinn stuðning og heildstætt úrræði til þess að læra og dafna. Við fórum af stað fyrir nokkuð mörgum árum síðan, hópur starfsfólks og foreldra, til að velta fyrir okkur hvernig skóla vantaði í íslenskt skólaumhverfi.“

Arnarskóli er staðsettur á Kópavogsbraut í húsnæði sem er hluti af gamla Kópavogshæli, húsnæði sem er byggt fyrir fötluð börn. Atli segir því húsnæðið henta vel þörfum barnanna og staðsetninguna virkilega góða.

Skólastarfið segir hann hannað til að mæta einstaklingsþörfum hvers og eins og megin markmiðið vera það að öll börn geti fengið það skólaumhverfi sem hentar þeirra þörfum. Í ljósi hans reynslu, foreldranna og fagmanna sem voru með í þróuninni, segir hann þörfina á skóla sem gat boðið upp á heildstætt úrræði fyrir börnin hafa verið mjög mikla.

 

Þar sem skóla- og frístundastarfi er fléttað saman. Þar sem krakkarnir eru á sama staðnum, með sama starfsmannahópnum og með fólki sem þeir treysta.

 

Atli segir inntökuna í skólann ekki háða sérstökum greiningum heldur hafi þau ákveðið að líta öðrum augum á það hvernig inngöngunni sé háttað.

„Okkar þekking er að vinna með börnum með þroskafrávik. Við hugsum skólann fyrst og fremst fyrir börn með þroskafrávik en það eru engar sérstakar greiningar eða viðmið með þroskatölur. Við viljum þjónusta börn sem þurfa mikinn stuðning. Börn sem við höldum að þurfi á þessum samfellda degi að halda.“

 

Við leggjum mikla áherslu á einstaklingsmiðað nám og einstaklingsmiðað starf. En á sama tíma erum við að stefna á að geta tekið þátt í hópum og styðja börnin í því að vinna saman, leika saman og læra saman. Við gerum það í skrefum sem hentar hverjum og einum.

 

Atli segir enga tilviljun að flestir skólar Íslandi séu byggðir þannig upp að það sé lært fyrripart dags og svo frístundir seinnipart dags.

„Það hentar langflestum börnum að hafa það þannig. En það hentar alls ekki öllum. Þess vegna fórum við af stað með Arnarskóla.“

Þegar hann er spurður hvar íslenskt samfélag standi í málefnum fatlaðra barna segir hann margt á Íslandi vera vel gert en þó vanti þar herslumuninn til að gera það enn betur sem snýr að foreldrum og börnum.

„Þessir biðlistar eru erfiðir og skaðlegir, sérstaklega fyrir unga krakka.“

Hægt er að hlusta á viðtalið í heild sinni á visir.is eða á helstu hlaðvarpsstöðvum 

Þættirnir Spjallið með Góðvild eru sýndir á Vísi. Verkefnið er afurð margra ára samstarfs Sigurðar Hólmars Jóhannessonar sem er í stjórn Góðvildar og Ágústu Fanneyjar Snorradóttur kvikmyndagerðarkonu og eiganda Mission Framleiðslu. Þáttastjórnendur eru Sigurður Hólmar Jóhannesson, Þórunn Eva Pálsdóttir og Ásdís Arna Gottskálksdóttir.

Þættirnir eru nýr vettvangur til að koma málefnum langveikra og fatlaðra barna á framfæri og auka í leiðinni sýnileika fyrir mikilvæg málefni. Hægt er að hafa samband við Sigurð og Ágústu Fanney vegna þáttanna í gegnum vefsíðuna godvild.iseða samfélagsmiðla félagsins. Með því að styrkja Góðvild þá ertu að styðja við langveik og fötluð börn á Íslandi. Styrktarreikningur 0301-26-660117, kennitala 6601172020.